Faia Bintureira

hai sítios de riu que naide

ye capaç d'alhá topar,

solo ls uolhos alhá chégan,

las abes cun sou bolar.

Fonso Roixo

Bista de l Picon de ls Arteiros

 

se pudíran ir cul riu

ls uolhos adonde eirien?

indo assi pula corriente,

muitos uolhos se perdien.

 

Fonso Roixo

 

 

Picon de l diabo 1

Augarielha de Manuol Bandarra

Anque meta muita grima,

de mirá-lo nunca acabo:

nunca tan guapo picon

poderie ser de l diabo.

Talbeç nome dalgun dius

pagano, hai muito tubira:

anton de diabo l nome

era pa que l dius squecira.

Fonso Roixo

San Paulo

Augarielha de Manuol Bandarra

Grandura cierta la galga
tenga para que bien ande:
se pequeinha lhougo para;
scacha cul peso, mui grande.

Fonso Roixo

Freznos ne l cerrado

Augarielha de Manuol Bandarra

Bózio de tiempo i selombra,
remenar donde s'antriça
un mundo que mos quedou:
stá cerrada la canhiça.

Fonso Roixo

Picon de ls Arteiros

Augarielha de Manuol Brandarra

Anriba mos bólan ls uolhos
- tan altos quédan arteiros -,
i adomínan l riu, que ye
l rei de ls assomadeiros.

Fonso Roixo

Ancho de Mundin

Augarielha de Manuol Bandarra

Na bena i bordas de l riu
silenços bózian i oulores;
tínhe-se l'auga i arribas
de sangre, choro i delores.

Fonso Roixo

Picon de l diabo

Augarielha de Manuol Bandarra

Chégan ls nuobos, i yá ls bielhos
diuses domínan ls altares
- cumo este picon citote -,
i atráien rezas i oulhares.

Dízen ls nuobos: son diabros
q'anfernízan buossas bidas,
nun merécen sacrafícios,
son buossas rezas perdidas,

ye l cielo deilhes scusado,
sien nada que pena bala.
Bénen ls nuobos saçardotes,
i contra bida mui mala

outra oufrécen sien delor
i amanáçan cul einfierno.
Fui assi que este Picon
perdiu calor cum' eimbierno

que l nome ancarambinou.
Algo nel nun se perdiu:
nobreza de l bielho dius,
centinela a bela' l Riu.

Fonso Roixo

Peinhas Falcon

Augarielha de Manuol Bandarra

Fincones son centinelas,
cunta cuontas l camino,
tierra burmeilha ye sangre
de las bidas sien carino

que pan fazírun de nadas;
ranhido berde ls cerrados,
sien arbles adonde póusen
ls uolhos yá mui cansados

de la prainada sien fin;
cul oundear de l cabeço
bai la música beilando,
adonde ten sou ampeço

un mundo que mais azul
do que l nuosso s'adebina;
nunca se bei l caminante
que a cada passo zatina,

de ls uolhos todo colgado,
derretido culs oulores,
preso ne l Praino i zenhado
a hourizontes i delores.

Fonso Roixo

Ls Spárracos

Augarielha de Manuol Bandarra

Antre ls ocres i amarielhos
oulia l berde an sploson
de sequidade: ye l praino
cula sede an ouracion.

Lhargo camino onde lhieba
se l azul tan loinje aceinha?
Na prainada árden fogueiras
de silenço, até sien lheinha!

Tan lhargos son ls hourizontes
i quaije óndias ls cabeços,
que apledía l pensar sierras
i ls uolhos sónhan ampeços.

Amarielho ye restroilho,
amarielhos son penheiras:
nadas que esta tierra dá,
adubados cun canseiras.

Queda, anton, la lhibardade
sien lhemites; mas la sina
ye l cuorpo ser bagamundo,
que l’alma nun l’adomina.

Fonso Roixo

Çaramal

Augarielha de Manuol Bandarra

San Paulo, miraba l riu,
Mas bie-lo siempre mui mal,
Pula nubre que chubie
De l Cachon de l Çaramal.

Agora, cula barraige,
Ye mais clara la bision:
Mas nun drume l'oulibeira
Sien l'arrolhar de l cachon.

Upe l berde an arrebento
Menos ne ls palos mais bielhos,
Mas rente al suolo yá spreita
L tenhir de ls amarielhos.

Mal se bei l riu cun sue auga,
Pus l'ancanto ye sue obra:
Faias, arribas, picones,
Bida an que todo se zroba.

Fonso Roixo

Peinhas

Augarielha de Manuol Bandarra

Talbeç cabalhos sperando
que algue yerba le dé seinha,
i de tanto q'asperórun
quedórun cabalhos-peinha.

Lhombos negros, bien criados,
diuses antigos, quien sabe,
han de ser lhapos ambaixo
que muita grima só cabe

donde un de l cielo se sconda:
son centeilhas, ye la nuite
cun scuro que naida beia
i oulios que naide scuite.

Pul cielo spargiu-se sangre
de ls sacrafícios, oufierta
a diuses que a carbalheiras
nien dan la medida cierta,

arranadicas cumo eilhes.
L quei míran nas paisaiges
ls gordos cabalhos-peinha?
Parados, sónhan biaiges.

Fonso Roixo

Eimociones

Augarielha de Manuol Bandarra

Nun las sumbramos, mas nácen;
son nuossas, sien tener duonho;
a bezes nun las queremos;
outras, bida que fui suonho.

Cun sue fuorça sien lhemites,
definhen nuossa berdade
i, porque an nós arrebéntan,
son formas de lhibardade

que lhebamos pula rede,
nun mos bóten a perder
nien créçan mais do que puoden
andrento de nós caber.

Uas mos lieban al cielo,
outras mos tráien l’einfierno,
sálban, mátan, dan calor,
pónen-mos frius cum’eimbierno.

Que ye sien eilhas la bida?
Que mais que piedra seriemos?
Pesórun l que somos, i era
mais pesado l que sentiemos.

Fonso Roixo

L RIU

Augarielha de Manuol Bandarra

Parece un poço por pie,
nadado por oucas mil,
quando pítulas assóman
ls galhos ne ls més d’abril,

mas ye un milagre sien nome:
nun son oucas, que son cuolhos
de faias que arrólhan l Riu,
tan guapas que angánhan ls uolhos;

datrás al passar choraba
l’auga de l riu ne ls cachones,
agora tarda-se al speilho,
nun cuorre i ten bien rezones…

Fonso Roixo

Maçcarilha 2

Pintura de Manuol Bandarra

Nunca sou rostro amostrórun
demonhos ou diuses séian,
cun miedo a las maçcarilhas
porque las fuorças l'apéian

antre bózios i quelores,
carrancas i mil chocalhos:
un die mundos de magie,
al outro tórnan ls trabalhos.

Rastro de bielhos feitiços
restros de mundos sagrados:
percisamos inda deilhes
an maçcarilhas colgados.

Nun arrinques l que aguanta
l mundo que te criou:
nun se bei, mas sien raiç
l'arble mais fuorte secou.

Fonso Roixo

Maçcarilha1

Pintura de Manuol Bandarra
[2º prémio ne l cuncurso MASCARARTE2007, pormobido pula Cámara de Bergáncia]

Se alguien cua maçcarilha
cuida que l rostro scundie,
saba que, an beç de scunder,
amostra mais l que ye.

Ciertos mundos nun se béien,
mas hai que star cun atento,
pus mui ralo l ser por fuora
mostra l que somos andrento.

Fonso Roixo

natal para todos

Augarielha de Manuol Bandarra

Ua arble queda inda berde,
mesmo se l'eimbierno abança:
quando la sprança se perde,
hai inda rezon de sprança.

Dízen mil streilhas na nuite
«ye de todos l Natal»,
mas quédan loinge i quien scuite
ls ais nun hai! Crece l mal...

Fonso Roixo