Bista de Spanha

Patrielhas

La Jolda

Almeixinas roxas(berdes)

Madronhos

froles de castanheiro

scobas

Manhuço de froles

Chibarro

mui ralo bés l chibarro

aburmelhando ls caminos,

son mui guapos ls sous bagos

anque séian pequeninos.

Fonso Roixo

Xara2

nun cuolhas la flor de monte,

que nun aguanta tues manos:

quelor para béren todos,

oulores lhibres i sanos.

Fonso Roixo

xara1

Dúran pouco ciertas flores,

muorren cumo arde la cera:

dan quelor i apuis se ban,

deixando-mos l anho a spera.

Fonso Roixo

Xara

yá nun aguántan las xaras

sou berde ne l més d'abril

i ábren-se an branco: só abeilhas

als beisos son mais de mil.

Fonso Roixo

Tomilhos1

hai froles que son andebles

i por esso inda mais guapas,

bíben anquanto salbaiges,

muorren-se se l sol le tapas.

Fonso Roixo

Madressilva1

nun te dan muitos balor

por nun seres mui bistosa,

mas bien bi cun quanta ambeija

an ti miraba la rosa.

Fonso Roixo

Madressilba

spreita antre silbeirones,

quaije naide dá por eilha,

mas cun sou hounesto oulor

la madressilba ye streilha.

Fonso Roixo

Fedieira

sou fuogo la fedieira

bota dues bezes al anho,

tinhe arribas cun sues fuolhas:

sabe tan bien esse anganho...

Fonso Roixo

zgalha de Carbalheira

inda un die hei de antender

porquei úsan ls carbalhos

pa dezir l que nun puoden:

carbalhos nun son caralhos!

Fonso Roixo

 

Tomilhos

cabecicas a salir

dun berde niu de serpiente,

eilusion de roixo a arder:

nun se bibe só de l diente...

Fonso Roixo

Galha de niebro

al loinge son coraçones

als brincos lhadeira arriba,

acerca serena fuorça

adonde un mundo se striba.

Fonso Roixo

 

frol nua peinha

dar froles an tierra buona,

de bida normal ye seinha,

mas guapas son a drobar

froles que nácen an peinha.

Fonso Roixo

Urzes

nun buolben la cara al friu,

son froles de tierra pobre:

uns ardórun-lo de sangre

outros cunquístan l ser nobre.

Fonso Roixo

froles de Primabera

ye na frol que todo ampeça,

puis nien solo antressa l fruito:

anque benga muorte cierta,

nun stamos siempre de lhuito.

Fonso Roixo

Froles

bés todo l mundo frolido

tou uolho al meio un boton:

cuidado que las abeilhes

puoden spetar-te l ferron.

Fonso Roixo

La bielha ribeira

triste, la bielha ribeira

nun sabe l que neilha cuorre:

se sue auga nun dá bida,

ye beneno onde se muorre.

Fonso Roixo

Scobas i tomilhos

pa ber scobas i tomilhos

bonda assomar sues quelores,

inda melhor berien ls uolhos

se pintaras sous oulores.

quien ten miedo compra un perro,

assi nun hai quien l afronte

se, pa ber la primabera

berdadeira, fur al monte.

Fonso Roixo

Faia

hai faias que méten miedo,

fázen de nós pequerricos:

hai farroncas que se scáchan

an pie deilhas als cachicos.

mira-la bien, cun respeito,

bei na faia ua scultura

de l Riu, que hai melhones d'anhos

trabalha i inda apedura.

hai yerbas que neilhas médran,

 fázen páixaros sou niu:

son las faias un bibeiro,

sou hourtelano ye l Riu.

grande poeta ye l Riu,

Manuol sou pintor mui lhano:

an beç de tintas ye l Riu

que le cuorre pula mano.

pintas l Riu als cachicos,

nunca acabas de l pintar,

quanto mais pintas, mais gana

mos queda pa ls dous mirar.

Fonso Roixo

S. Juan de las Arribas

hai pul mundo marabilhas

que natura mos oufrece,

mas mui ralas s'acumpáran

a las que l Douro eiqui tece.

yá miles d'anhos la giente

eiqui bibiu, que admirança:

San Juan de las Arribas

ye niu de bida i de sprança.

era tierra de zoelas,

pátria de Eimílio Baleso,

só pul sítio adonde stá

serie ua tierra de peso.

San Juan de las Arribas,

de outros diuses fui altar:

hoije ye solo un sbarrulho

que dá gana de chorar.

sbarrulhou-se l bielho castro,

cuntínan guapas las bistas,

sínte-se l peso de l tiempo:

todo se muorre, nun zistas...

tantos pobos que passórun,

solo quedou siempre l Riu:

tamien la sue auga passa

que até las faias rumpiu!

al mirar tanta belheza,

inche ls uolhos de respeito:

ardança que te deixórun,

tamien ls outros ténen dreito.

Fonso Roixo

La canal de la Belheira

al loinge todo scurece,

solo acerca béien ls uolhos;

todo al loinge mos faç friu,

acerca calécen ls cuolhos.

nun deixes passar l tiempo

sien ires a la Belheira,

se te méten miedo peinhas,

puodes çcansar na Chaneira.

nien todo se bei de l grande

cabeço de la Marrielha:

solo acerca bés l nuobo,

loinge la bista ye bielha.

Fonso Roixo

Recobeilho2

l Douro nun ye só bino

fino, ou cumo naide biu

lhadeiras i bistas guapas:

ye tamien nome dun Riu.

hai melhones d'anhos cuorre

i outros tantos mos dá bida:

fazé-lo inda un Riu mais guapo,

ye essa la nuossa lhida.

barraiges que prénden l Riu,

tamien dan lhetracidade:

mas mie sprança ye que, un die,

ganhe outra beç lhibardade.

ai Douro, que an tues arribas

yá corriu tanto sudor!

quien capaç ye de mirar-te

sien respeito i muito amor?

dízen, Douro, que nun tenes

poetas, solo canseiras:

son ciegos, nun béien ls bersos

screbidos pulas lhadeiras.

quieren, Douro, que tou nome

só por eilhes seia ousado:

son boubos, porque yá seclos

sós por todos nomeado

Fonso Roixo

L Çaramal

inda quando ls uolhos béie

só d'anriba dun picon,

puodes manginar un mundo

donde caba l coraçon.

  

 l cachon de l çaramal

oubie-se de madrugada:

sue boç por melhones d'anhos

cantou, stá agora calhada.

todo cratícan, porméten,

quando stan n'ouposiçon;

quieren fazer de nós burros:

será que ténen perdon?

Fonso Roixo

 

Recobeilho1

persigue l Riu l pintor,

nunca acaba de l pintar;

tamien l poeta, anque loinge,

nunca deixa de l cantar.

hai seres que, de tan fuortes,

todo l sentido mos fíren,

mas outros mos fázen outro,

só por acerca eisistíren.

se pensares que nien siempre

l Riu por eiqui passou,

melhor antendes tou çtino:

to l que eisiste s'acabou.

Fonso Roixo

Peinhas mirando l riu

quien speilho faga de l riu,

ye seinha de pouco siso:

solo las peinhas se míran

cumo se fúran Narciso.

bés tanta guerra pul mundo,

que antender nun sós capaç:

nun ten tue bida tamien

mui poucas horas de paç?

muitas leis que nun stan scritas

mos gobérnan nuossa bida,

ye l bibir an sociadade

respiraçon assestida.

Fonso Roixo

Ancho de Mundin (barrento)

corrie a bé-lo de loinge,

mas ne l uolhos nun cabie,

miedo, respeito, admirança,

todo al bé-lo you sentie.

fui miu porsor d'oumildade,

mie medida de ser grande,

bandeira de lhibardade,

cuorre sien que naide l mande.

- porque pintas, á pintor,

que belharaça te dou?

- pinto para alhá de ls uolhos,

mundos que dius nun criou.

Fonso Roixo

Carbalheiras

a fin d'outonho éran fuogo

sues folharascas, nien lheinha

dában: tiempo era de friu,

fame dura cumo peinha.

cortában las carbalheiras,

nun chegában a carbalhos:

ye assi la mocidade

se cortada puls trabalhos.

l sou fruito son belhotras,

mas mais berdégan ls bulhacos:

bencir a poder d'anganhos

ye la fuorça de ls mais fracos.

Fonso Roixo

L cachon de l'Aguilhon

inda tengo ne l oubido

l rugido de l cachon:

cumo you, todo demuda,

ser i nun ser, nuosso son!

seran las mesmas las cousas

apuis de por ti pintadas?

que te tráien ougarielhas

pula parede colgadas?

pintas pa bencir l tiempo,

nada hai que nun te spante:

todo demuda se lias

tu, l mundo i un sfergante.

Fonso Roixo

SENDIN1

l quei define ua tierra,

se sous cachcicos son tantos?

çcubres uns, mas ls que squeces

son muitos, nien sabes quantos.

passas na rue alta nuite

quando l silenço spertou:

ye l retombo de l tiempo ido,

que a las piedars s'agarrou.

por fabor, deixai ls puiales

pulas rues siempre quedar:

culs que se fúrun perciso

dun sítio pa cumbersar.

 Fonso Roixo

SENDIN

ciertas eimaiges, que bíben

na raiç de la mimória,

nun mos damos bien de cuonta

que, an beç de bida, son stória.

la mimória son cachicos

que nuosso cimento ajunta:

l sentido que le damos

sien nós se perde i çcunjunta.

todo traiste al Sagrado,

ende de l mundo era l centro:

stá sparbado, mas nun zistes

de l poner de nuobo andrento.

Fonso Roixo

Casa de aldé mirandesa

piedra suolta, teilha bana,

puial, buraca na puorta:

mie casica mirandesa,

you bibo de stares muorta...

quien nunca an aldé bibiu

nien casa que fura sue

tubo, acaba por fazé-la,

naide bibe sien algue.

ye tan grande la cidade

 mas todo neilha nun cabes,

tan pequerica l'aldé

i tan poco deilha sabes....

Fonso Roixo

Casulho na Carboneira

Ai mius casulhos de nino,

donde l tiempo s'anfrisgou:

stais siempre de puorta abierta,

fui manha que me quedou...

Fonso Roixo

 

Prado ne l Baiunco

ardírun an claro ls uolmos,

só berdégan na mimória:

l que se bai queda an nós,

de nós depende sue stória.

Fonso Roixo

 

Peinhas Cabalho1

donde amor, delores, fames,

deixórun sou rastro i seinhas?

uns, tan lhargos!, son caminos;

outros, tan duros!, son peinhas.

Fonso Roixo

 

L Palumbar

yá son ralas las palombas,

só quedórun palumbares:

inda bibe l que se muorre,

se un sentido le ambentares.

Fonso Roixo

 

Maçcarilha10

miras-te al speilho i dás buoltas

cumponendo l calantriç:

cada die t'amostras outra,

ye la máçcara que l diç.

Fonso Roixo

Mascarilha9

cuidabas que eras solo un,

cun máçcara an dous te biste:

mal sabes yá se sós tu

ou máçcara que poniste.

Fonso Roixo

 

Mascarilha8

uolhos i boca uns buracos,

i sou rostro retrocido:

aqueilhes dan-mos mistério,

ye este l tiempo sufrido.

Fonso Roixo

 

Mascarilha7

nunca han de acabar las máçcaras,
siempre outros mos hemos querer:

uas amóstran quien somos,

outras son pa mos scunder.

Fonso Roixo

Mascarilha6

cuntigo fazien triato

ls griegos, agora Antruido

i outras lhiturgies sien tiempo:

hai mais máçcaras que cuido.

Fonso Roixo

Mascarilha5

atrás de las maçcarilhas

muita cara anda scundida:

porque ousaran ciertas gientes,

maçcarilha to la bida?

Fonso Roixo

Mascarielha3

uolhos i boca de spanto,

mais que repuosta, pregunta

sós: de preguntar nun pares

al mistério que te ampunta.

Fonso Roixo

Maçcarilha0

uns mundos atrás scundemos

outros tantos mos amostras:

sós pregunta, rito, f''rida,

somos diuses, tu las costras.

Fonso Roixo