segunda-feira, 31 de janeiro de 2011

L cigano


sien tierra, sien paradeiro,
era tue pátria l camino; 
agora ye outro l mundo,
nien tu sabes yá tou çtino.

Fonso Roixo
 

domingo, 30 de janeiro de 2011

La Carroça


adonde bás strada fuora,
que só berdégan las cuostas?
onde perdiste la gana
i tues eideias stan puostas?

un die perdiste l camino,
naide sabe bien porquei;
quien podira adebinar
l que a uolho nun se bei...

cumo angánhan ls caminos
onde buscamos la suorte:
cuidemos sembrar la bida,
solo colhimos la mourte.


sábado, 29 de janeiro de 2011

Apuis de se arrebolcar.


por bezes la mordesquina
nun hai meia de parar:
nun hai cumo un arrebolco
para melhor s'arrascar.

Fonso Roixo

sexta-feira, 28 de janeiro de 2011

Arando binha.


arar binha era un termiento
que t'anfernizaba l die:
bolbiste todo an binagre
cun todo te refodies.

Fonso Roixo


quinta-feira, 27 de janeiro de 2011

L bolber de la huorta.


mestre an mil artes tu fuste,
donde l sustento benie,
mas la huorta nun era arte,
bolbies-la pura poesie

Fonso Roixo


quarta-feira, 26 de janeiro de 2011

Recobeilho - SENDIN


tanto fondo cuorre, antre faias,
tanto miedo mete l Riu...
mas la giente cun sues artes
siempre l passou i benciu.

Fonso Roixo


terça-feira, 25 de janeiro de 2011

Ls cestos sterqueiros


de l stierco se fazie tierra,
era l adubo que habie:
nada stragaba i mais fuorte
l fruito cun el crecie

Fonso Roixo


segunda-feira, 24 de janeiro de 2011

Un die de nubrina


nubrina que acubre ls montes,
un die ben lhougo outro bai,
só nun se bai ambora
la que andrento ls uolhos cai.

Fonso Roixo

 

domingo, 23 de janeiro de 2011

Retrato dun Sendinés


l retrato que te fazes
siempre an ti mesmo se sbarra:
mas se fur [este] grande l pintor
até tue alma t'agarra.

Fonso Roixo

sábado, 22 de janeiro de 2011

Ls dous fazien pu la bida.


cumpanheira de to ls dies,
piernas an tanta canseira,
nada eisige i todo dá
ye amiga berdadeira

Fonso Roixo



sexta-feira, 21 de janeiro de 2011

La Scuola


pássan ls anhos i la scuola
nunca sal de la lhembrança:
paíç sien scuolas a sério
nunca sou feturo alcança.

Fonso Roixo


quinta-feira, 20 de janeiro de 2011

Cabalho



adonde bás galopando,
que prados berdes te cháman?
abranda porque outras yerbas
eiqui acerca recláman.

Fonso Roixo


Cabalhos



sien freno, sien cabeçada,
galope de lhibardade:
carreira que nun ten amos
mui loinge bai, de berdade.

Fonso Roixo

quarta-feira, 19 de janeiro de 2011

Riu Douro an Miranda



cada beç que an ti nabego
solo lhágrimas me sálen:
bien lhibo ls uolhos al cielo,
nien las águilas me bálen.

Fonso Roixo
 


Zgranando freijones



a cada baina que zgranas,
quedas mirando la mano:
la casca, mai portetora,
ten que deixar campo al grano.

Fonso Roixo

 

terça-feira, 18 de janeiro de 2011

Riu Douro



por mais que mire tues augas,
nun paro de preguntar:
bien sede ten quien te bebe,
bien grande há de ser l mar.

Fonso Roixo

Carbenando



bien bieldres que carbeneste,
la bida siempre nun filo:
hai fuorças que nun s'anténden,
nada acumpara al tou stilo.

Fonso Roixo

segunda-feira, 17 de janeiro de 2011

La Biuba


 
siempre sola puls caminos,
ye l negro agora tue teç,
quien sabe se essa rendica
nun te casaba outra beç...
 
Fonso Roixo
 
 

domingo, 16 de janeiro de 2011

Camino pa la Ribeira de Teixeira


 
todos caminos ampéçan
ne l querer saber d'alguien:
se uns bénen acontra nós
al para alhá ban tamien
 
Fonso Roixo
 
 

sexta-feira, 14 de janeiro de 2011

La huorta


 
stá fonda l'auga que sacas
de l poço cula ciguonha:
tu cuidas que l'adominas
mas ye eilha la tue duonha.
 
Fonso Roixo
 
 
 
 

quarta-feira, 12 de janeiro de 2011

L Abó i la Nieta


 
que béien al loinge ls uolhos
que pónen sério i dan risa?
el stá sério a ousmar l tiempo,
nun sabe eilha adonde pisa.
 
Fonso Roixo

Principe Real Lx



alhá bou de bicicleta,
bou a dar ua fugida:
tal cumo a andar daprendi,
hei de un die muntar la bida

Fonso Roixo

segunda-feira, 10 de janeiro de 2011

Ribeira de l Pan Caliente



talbeç de ls muitos molinos
le cháman de l pan caliente:
hai fartura nas ribeiras
la fame ten-la la giente.

Fonso Roixo