quinta-feira, 31 de janeiro de 2008

Picon de l diabo

Augarielha de Manuol Bandarra




Chégan ls nuobos, i yá ls bielhos
diuses domínan ls altares
- cumo este picon citote -,
i atráien rezas i oulhares.

Dízen ls nuobos: son diabros
q'anfernízan buossas bidas,
nun merécen sacrafícios,
son buossas rezas perdidas,

ye l cielo deilhes scusado,
sien nada que pena bala.
Bénen ls nuobos saçardotes,
i contra bida mui mala

outra oufrécen sien delor
i amanáçan cul einfierno.
Fui assi que este Picon
perdiu calor cum' eimbierno

que l nome ancarambinou.
Algo nel nun se perdiu:
nobreza de l bielho dius,
centinela a bela' l Riu.

Fonso Roixo


Peinhas Falcon

Augarielha de Manuol Bandarra




Fincones son centinelas,
cunta cuontas l camino,
tierra burmeilha ye sangre
de las bidas sien carino

que pan fazírun de nadas;
ranhido berde ls cerrados,
sien arbles adonde póusen
ls uolhos yá mui cansados

de la prainada sien fin;
cul oundear de l cabeço
bai la música beilando,
adonde ten sou ampeço

un mundo que mais azul
do que l nuosso s'adebina;
nunca se bei l caminante
que a cada passo zatina,

de ls uolhos todo colgado,
derretido culs oulores,
preso ne l Praino i zenhado
a hourizontes i delores.

Fonso Roixo

domingo, 27 de janeiro de 2008

Ls Spárracos

Augarielha de Manuol Bandarra

Antre ls ocres i amarielhos
oulia l berde an sploson
de sequidade: ye l praino
cula sede an ouracion.

Lhargo camino onde lhieba
se l azul tan loinje aceinha?
Na prainada árden fogueiras
de silenço, até sien lheinha!

Tan lhargos son ls hourizontes
i quaije óndias ls cabeços,
que apledía l pensar sierras
i ls uolhos sónhan ampeços.

Amarielho ye restroilho,
amarielhos son penheiras:
nadas que esta tierra dá,
adubados cun canseiras.

Queda, anton, la lhibardade
sien lhemites; mas la sina
ye l cuorpo ser bagamundo,
que l’alma nun l’adomina.

Fonso Roixo

Çaramal

Augarielha de Manuol Bandarra



San Paulo, miraba l riu,
Mas bie-lo siempre mui mal,
Pula nubre que chubie
De l Cachon de l Çaramal.

Agora, cula barraige,
Ye mais clara la bision:
Mas nun drume l'oulibeira
Sien l'arrolhar de l cachon.

Upe l berde an arrebento
Menos ne ls palos mais bielhos,
Mas rente al suolo yá spreita
L tenhir de ls amarielhos.

Mal se bei l riu cun sue auga,
Pus l'ancanto ye sue obra:
Faias, arribas, picones,
Bida an que todo se zroba.

Fonso Roixo